Ғылым докторы Қайрат Жолдыбайұлы Нұр-Мүбарак мешітінде жаңа қызметіне кірісті

Жаңа оқу жылындағы Нұр-Мүбарак университеті төңірегіндегі елеулі жаңалықтың бірі — оқу орнының оқу-әдістемелік мешітіне белгілі исламтанушы ғалым, PhD докторы Қайрат Жолдыбайұлы Бас имам болып тағайындалуы. Қазақстан мұсылмандары діни басқармасының төрағасы, Бас мүфти Ержан қажы Малғажыұлының бұйрығына сай Нұр-Мүбарак университетінің басшылығы ректор, профессор Жуда Басюни, проректор, профессор Шамшәдин Керім мырзалар бастаған топ қасиетті жұма намазының алдында жамағатты жаңа имаммен таныстырды.

 

Бұл Нұр-Мүбарак мешітінің еліміздегі өзге Алла үйлерінен айырмашылығы оның оқу-әдістемелік орталық болуында. Яғни университеттен білім алушы студенттер күнделікті 5 уақыт намазын мешітте оқып қана қоймай, дәрістерден тыс кездерде қосымша сабақтар мен Құран жаттау, уағыз айту сынды тәжірибелерден өтеді. Сондықтан Бас имамның ғылыми дәрежесінің болуы студенттердің білімі мен білігін шыңдауда біршама артықшылықтарға жол ашпақ. Ал бұған дейін Бас имам қызметін атқарған Құрмет Смагулов та бірнеше тілді жетік меңгерген әрі қасиетті Құран хафизі. Құрмет Смагулов исламтану ғылымы бойынша докторантуралық білім алуына сәйкес, ғылыми зерттеулерге біршама ден қоюуына тура келуде.

Ал докторлық ғылыми диссертациясын былтыр ғана сәтті қорғаған Қайрат Жолдыбайұлы енді жаңа іргелі ғылыми жобаларды қолға алмақ. Осы кезге дейін жарық көрген бірнеше діни кітаптардың авторы әрі наиб-мүфти, бас имамдық қызметтермен қатар соңғы жылдары Islam.kz порталының жемісті жұмыстарымен де ата дініміз жолында жан-жақты еңбек етіп келе жатқан жас ғалым көптен бері көкейінде жүрген Қасиетті Құранға қатысты қазақша құнды еңбектер жазу жайлы арманын ақиқатқа айналдырудың сәті келгендей.

Нұр-Мүбарак университетінің ұжымы Қайрат Жолдыбайұлына жаңа бастамалары мен білім-ғылым саласында сәттіліктер тілейді!