Нұр-Мүбарак баспасынан жақында ғана жарық көрген "Тәсдид" кітабы халықаралық ISAМ орталығына тапсырылды

Нұр-Мүбарак университетінің жанындағы Әбу Ханифа ғылыми-зерттеу орталығының түпнұсқадан қазақ тіліне аударған «Тәсдид» кітабы енді Исламдық зерттеулер орталығының (ISAM) қорына да енді.

 Түркия Республикасы Дін істері басқармасына қарасты ISAM  әлем үшін ислам энциклопедиясын жасау мақсатында 1984 жылы құрылып, сол уақыттан бастап барлық зерттеулерді жинақтай бастаған. Қазір 700 мыңнан астам кітап қоры бар және 550 мыңдай мақалалары қамтылған үлкен көлемді кітапхананың осыдан 37 жыл бұрынғы мақсаты орындалып, энциклопедия да жарық көрді. Ислам зерттеу орталығының ауқымы кеңейген. Қазіргі таңда арнайы оқу гранттары, соңғы зерттелген классикалық әрі заманауи еңбектерді жарыққа шығаратын баспа жүйесі жолға қойылған. Ең бастысы зерттеуші үшін қолайлы жағдай мен мүмкіндіктер жасалған.

Нұр-Мүбарак университетінің ізденуші жас ғалымдары Сырым Шәкизада мен Бижан Ілесбеков ғылым жолындағы іссапар аясында осы орталыққа арнайы барып, қазақ жерінен шыққан бірегей ғалым Хусамуддин ас-Сығнақидың «Тәсдид» еңбегін табыстады.

  • Европа мен Азиядан тұратын Түркия еліне әлемдегі зерттеушілер табан тіреп, ISAM-ға арнайы зиярат етеді. Біз де Нұр-Мүбарак университеті жанындағы Әбу Ханифа ғылыми-зерттеу орталығында дайындалған су жаңа еңбегімізді осы Ислам зерттеу орталығына табыстадық. Кітапты осылай шығарып, оны сыйға беруіміз де біздің елде де мүмкіндік бар екенінің белгісі деп ойлаймын,-дейді докторант Сырым Шәкизада.

⠀Сондай-ақ араб немесе түрік ғалымдарының есімдерін көбірек естуімізге  олардың географиялық орналасуы, еңбектің ғылыми айналымға өтуі, ислам әлемінде университет пен медреселерде оқу құралы ретінде өтілуі, кітапханаларда кітаптың оңай табылуы секілді факторлар үлкен рөл атқарады дейді Нұр-Мүбарактың жас ізденуші ғалымдары.

⠀Енді Түркия еліндегі қазақ студенттер кітаптың араб тіліндегі өңделген нұсқасы мен қазақша аудармасын ISAM орталығынан қарап, таныса алады.

83