Нұр-Мүбарак
Египет ислам мәдениеті университеті
Жаңалықтар

„Нұр-Мүбарак„ ғалымдары Ғұламалар Кеңесінде

23/01/2017

Бүгін Бас мүфти Ержан қажы Малғажыұлының төрағалығымен Қазақстан мұсылмандары діни басқармасы жанындағы Ғұламалар Кеңесінің XV мәжілісі басталды,-деп хабарлайды www.muftyat.kz сайты. Еліміздің ата дін саласында маңызы зор бұл бас қосуға „Нұр-Мүбарак„ университетінің проректоры, профессор Шамшәдин Керім бастаған ғалымдар қатысуда. Яғни, теология ғылымдарының докторлары Алау Әділбаев, Мұхитдин Исаұлы мырзалармен қатар магистрантура, докторантурада білім алушы ұстаздар да бар.

3 күнге созылатын Кеңесте «Лизингтің үкімі», «Құрсақ ана (суррогат ана) болудың шариғи үкімі», «Пластикалық ота жасаудың үкімі», «Түйенің зәрін емдік мақсатта қолданудың үкімі», «Отбасындағы ер адамның міндеттері», «Мемлекеттік рәміздерге құрмет көрсетудің үкімі» атты пәтуалар бекітіліп, діни қызметкерлерді аттестаттаудан өткізудің қағидалары мен шарттары, Уақып қорының құжаты, т.б. мәселелер талқыланбақ.

Сонымен қатар, ҚМДБ Ғұламалар Кеңесінің мүшесі болған белгілі ғалым Әбсаттар Сманов туралы естелік мақалалар жинақталған «Ұстаз ұлағаты», «Жаназа», «Дін мен дәстүр ІІ», «Таухид», т.б. кітаптардың мәтіні мен мазмұнын талқылау жоспарланған.

«Құрметті, ғұламалар! Бүгін – Кеңестің 2017 жылғы алғашқы отырысы. Жоспар бойынша көптеген кітаптар мен пәтуаларды талқылауымыз қажет. Өздеріңіз жақсы білесіздер, қазір біздің қоғамда, әсіресе, мұсылмандар өмірінде Ғұламалар Кеңесінде бекітілген пәтуалардың рөлі мен орны артып келеді. 2016 жылы «Ғұламалар Кеңесінің» 4 отырысы өтті. Күн тәртібінде 37 мәселе қаралыпты. Кеңестің шешімімен 5 маңызды құжаттар мен Үндеулер қабылданып, 16 мәселе бойынша шешім шығарылып, 6 пәтуа бекітілді. Алла Тағала бүгінгі жұмысымызға береке берсін», – деп атап өтті Бас мүфти Ержан қажы Малғажыұлы.

gulama 2017

gulama 2017 1

gulama 2017 2

gulama 2017 3

gulama 2017 4

gulama 2017 6

Ұқсас жазбалар