Нұр-Мүбарак
Египет ислам мәдениеті университеті
Жаңалықтар

Университеттің тұңғыш ректоры Махмуд Хижази Халықаралық Файсал сыйлығымен марапатталды

11/01/2019

 

 

Халықаралық Файсал сыйлығы жыл сайын Сауд Арабиясының Файсал патша атындағы қордың ұйымдастыруымен тағайындалады. Әлемде Нобель сыйлығы жайлы білмейтін адам кемде-кем шығар, ал Файсал премиясы ислам әлемі ұсынған әлемдік деңгейдегі ең ірі сыяпатқа айналды. Сауд Арабиясы королі Файсал бин Абдулазиз мұраларын сақтау мақсатында балаларының бастамасымен 1976 жылы құрылған Файсал патша атындағы қор «Әлемді жақсартуға үлес қосқан жандарды» марапаттайды. Марапат  көлемі алтын төсбелгімен бірге 200 мың доллар, ол әр сала бойынша тағайындалады.

Нұр-Мүбарак университетінің алғашқы ашылған сәтінен бастап 13 жыл бойы ректорлық қызмет атқарған профессор, академик Махмуд Фахми Хижази энциклопедист ғалым деңгейіндегі ғұлама. Араб, неміс тілдері бойынша Каир, Мюнхень университеттерін үздік тәмамдаған. Өмірін ғылымға арнаған Махмуд Хижази Мысыр, Малайзия, Кувейт елдеріндегі жоғары оқу орын, орта мектепке арналған  30-дан астам оқулыққа ат салысқан, «Араб тілі тарихы», «Дәстүр мен модернизация арасында тіл білушлік», «Араб тіл білімі», «Заманауи араб ойларының тарихы», «Мәдениеттер диалогы» сынды кітаптардың авторы, бірнеше томдық кітаптар аудармасы, 150-дей мақала авторы. 150-ден аса докторлық және магистрлік диссертацияларға жетекшілік жасаған. Осынша еңбегі үшін академик Махмуд Фахми Хижази халықаралық Файсал сыйлығымен марапатталды.

Осындай ғұлама ғалымның қазақ еліндегі ислами жоғары білім ордасының іргесін бекітіп, жоғары білім бағдарламасының дұрыс бағытта дамуының негізін қалап кеткені Нұр-Мүбарак университетінің дәрежесін айқындай түссе керек.

Мысыр мен Қазақстан арасындағы алтынкөпір Нұр-Мүбарак университеті академик Махмуд Хижазидің жетістігімен құттықтап, әрқашан мақтаныш тұтады!

Ұқсас жазбалар